بھارت کے سابق اسٹار بلے باز اور کوچ ابھیشیک نایر نے موجودہ اسٹار بلے باز روہت شرما سے متعلق ایک دلچسپ قصہ سنایا ہے۔ روہت شرما اپنے مشہور پل شاٹس، بہترین کھیل کو سمجھنے کی صلاحیت اور مختلف انداز کے شاٹس کے لیے دنیا بھر میں جانے جاتے ہیں۔ انہوں نے اپنی کپتانی میں بھی ہندوستانی کرکٹ کو کئی اہم کامیابیاں دلائی ہیں، جن میں 2024 کا ٹی ٹوئنٹی ورلڈ کپ بھی شامل ہے۔
روہت شرما اپنی بیٹنگ اور کپتانی کے علاوہ میدان کے اندر اور باہر اپنے دلچسپ جملوں اور برجستہ انداز کے لیے بھی مشہور ہیں۔ ان کے مداح یہ بھی جانتے ہیں کہ روہت کو کبھی کبھار چیزیں بھول جانے کی عادت ہے، جو ان کی شخصیت کا ایک دلچسپ پہلو بن چکا ہے۔
سابق بھارتی بلے باز اور کوچ ابھیشیک نے روہت کی حاضر جوابی سے متعلق ایک پرانا واقعہ سنایا۔ روہت شرما کے آنے والے ٹی وی شو ’فیملی فل ہاؤس ود روہت شرما‘ میں گفتگو کے دوران ابھیشیک نے بتایا کہ ایک مرتبہ روہت اپنا کٹ بیگ ہی بھول گئے تھے، لیکن جب کوچ نے ان سے اس بارے میں پوچھا تو انہوں نے فوراً ایک کہانی بنا دی۔
ابھیشیک نے بتایا کہ یہ واقعہ اس وقت کا ہے جب روہت شرما صرف 17 سال کے تھے اور پہلی مرتبہ ممبئی کی رنجی ٹرافی ٹیم میں منتخب ہوئے تھے۔ یہ ایک اہم میچ تھا جس میں کئی بڑے کھلاڑی بھی شامل تھے۔
ابھیشیک کے مطابق، میچ والے دن روہت صبح سویرے اسٹیڈیم پہنچے، لیکن اپنا کٹ بیگ ساتھ نہیں لائے تھے۔ جب ان سے پوچھا گیا کہ ان کا کٹ بیگ کہاں ہے تو روہت نے جواب دیا کہ وہ ٹرین سے آ رہے تھے اور کسی شخص نے انہیں دھکا دیا، جس کے نتیجے میں ان کا کٹ بیگ گر گیا۔
ابھیشیک نے اس واقعے کو یاد کرتے ہوئے کہا کہ روہت اس وقت بھی حاضر جواب تھے اور انہوں نے فوراً ایک کہانی بنا دی تھی۔ ابھیشیک نے مذاقاً کہا کہ روہت کا ذہن اس وقت بھی اسی طرح کام کرتا تھا۔ اس قصے پر جب سب لوگ ہنسنے لگے تو روہت شرما نے ابھیشیک کی بات کی تردید کرتے ہوئے کہا کہ انہوں نے کوئی چالاکی نہیں دکھائی تھی بلکہ انہوں نے صرف وہی بتایا تھا جو حقیقت میں ہوا تھا۔
روہت شرما اب ٹیسٹ اور ٹی ٹوئنٹی انٹرنیشنل کرکٹ سے ریٹائرمنٹ کا اعلان کر چکے ہیں۔ وہ اس وقت بین الاقوامی سطح پر صرف ون ڈے کرکٹ میں کھیل رہے ہیں۔ انڈین پریمیئر لیگ میں وہ ممبئی انڈینز کی نمائندگی جاری رکھے ہوئے ہیں۔
