مغربی بنگال کے ضلع جنوبی 24 پرگنہ میں فالٹا اسمبلی کی دوبارہ پولنگ سے قبل ایک بڑی سیاسی پیش رفت سامنے آئی ہے۔ مغربی بنگال میں، ممتا بنرجی کی قیادت والی ٹی ایم سی پارٹی کو فالٹا حلقہ کے ضمنی انتخاب سے پہلے جھٹکا لگا ہے۔ پارٹی کے امیدوار جہانگیر خان نے کاغذات نامزدگی واپس لے لیے ہیں۔ انہوں نے اعلان کیا کہ وہ الیکشن سے دو دن قبل ہی مقابلے سے دستبردار ہو رہے ہیں۔ فالٹا ڈائمنڈ ہاربر لوک سبھا حلقہ میں آتا ہے، جسے ٹی ایم سی ایم پی ابھیشیک بنرجی کا گڑھ سمجھا جاتا ہے۔ فالٹا اسمبلی حلقہ میں اس ماہ کی 21 تاریخ کو دوبارہ انتخاب ہونے والے ہیں۔
امن اور ترقی کیلئے عوامی مفاد میں فیصلہ
پریس کانفرنس سے خطاب کرتے ہوئے جہانگیر خان نے کہا کہ وہ اپنے حلقے کے عوام کے مفاد میں فالٹا اسمبلی کی دوبارہ پولنگ سے دستبردار ہوئے۔ خان نے کہا، "میں فالٹا کا بیٹا ہوں اور میں چاہتا ہوں کہ فالٹا پرامن رہے اور ترقی کرے۔ ہمارے وزیر اعلی سویندو ادھیکاری فالٹا کی ترقی کے لیے ایک خصوصی پیکیج دے رہے ہیں، جس کی وجہ سے میں نے حلقے میں دوبارہ پولنگ کے عمل سے الگ ہونے کا فیصلہ کیا ہے،" ۔
میدان میں اب بی جےپی،کانگریس اور سی پی ایم
فالٹا حلقہ میں جہانگیر خان کا مقابلہ بھارتیہ جنتا پارٹی (بی جے پی) کے دیبانگشو پانڈا اور کانگریس کے عبدالرزاق مولا سے تھا۔ کمیونسٹ پارٹی آف انڈیا (مارکسسٹ) کے سمبھو ناتھ کرمی بھی انتخابی میدان میں ہیں۔
21 مئی کو فالٹا اسمبلی حلقہ میں دوبارہ پولنگ
الیکشن کمیشن نے مغربی بنگال کے جنوبی 24 پرگنہ ضلع کے فالٹا اسمبلی حلقہ کے تمام 285 پولنگ بوتھوں پر 21 مئی کو دوبارہ پولنگ کرانے کا حکم دیا ہے۔ 29 اپریل کو جب فالٹا میں اسمبلی انتخابات کے دوسرے مرحلے میں ووٹنگ ہو رہی تھی تو "سنگین انتخابی جرائم اور جمہوری عمل کی خلاف ورزی" کی وجہ سے دوبارہ پولنگ کا حکم دیا گیا تھا۔
21 مئی کو صبح 7سے شام6 بجے تک پولنگ
کمیشن نے کہا کہ تمام بوتھوں بشمول معاون پولنگ اسٹیشنوں پر دوبارہ پولنگ 21 مئی کو صبح 7 بجے سے شام 6 بجے کے درمیان ہوگی، "آزادانہ، منصفانہ اور شفاف" طریقہ رائے دہی کو یقینی بنانے کے لیے سخت حفاظتی انتظامات کے تحت پولنگ ہوگی ۔اس حلقے کے ووٹوں کی گنتی 24 مئی کو ہوگی۔
فالٹا حلقہ پولنگ کے فیز 2 میں تشدد
اسمبلی انتخابات کے دوران، فالٹا حلقہ پولنگ کے فیز 2 میں ایک فلیش پوائنٹ کے طور پر ابھرا، جس میں تمام بوتھوں سے متعدد الزامات اور واقعات رپورٹ ہوئے۔ دیبی پور (بوتھ نمبر 177) میں تنازعہ شدت اختیار کر گیا، جہاں بی جے پی امیدوار دیبانگشو پانڈا اور کئی ووٹروں نے الزام لگایا کہ الیکٹرانک ووٹنگ مشینوں (ای وی ایم) پر بی جے پی کے بٹن پر سفید چپکنے والی ٹیپ لگائی گئی تھی، جس سے ووٹروں کو پارٹی کا انتخاب کرنے سے روکا گیا تھا۔
دو مرحلوں میں ہوئی تھی پولنگ
مغربی بنگال اسمبلی کے انتخابات دو مرحلوں میں 23 اپریل اور 29 اپریل کو ہوئے تھے۔ باقی سیٹوں کے لیے ووٹوں کی گنتی 4 مئی کو ہونے والی ہے۔
