3b38350d-0ad7-4f55-8f59-ad3ec4129d842522026142317.jpg)
وزیراعظم نریندر مودی کے دو روزہ اسرائیل دورے کے دوران امریکہ نے ایک اہم اسٹریٹجک قدم اٹھاتے ہوئے پہلی بار اپنے جدید ترین F-22 Raptor لڑاکا طیارے اسرائیل میں تعینات کر دیے ہیں۔ یہ پیش رفت ایسے وقت میں سامنے آئی ہے جب خطے میں ایران کے حوالے سے کشیدگی میں اضافہ دیکھا جا رہا ہے۔ رپورٹس کے مطابق اسرائیل کے صحرائے نیگیو میں واقع اوودا ایئر بیس پر امریکہ کے 11 ایف-22 ریپٹر طیارے اتارے گئے ہیں۔ ماہرین اسے ایران پر دباؤ بڑھانے کی حکمت عملی قرار دے رہے ہیں اور بعض کے نزدیک یہ ممکنہ فوجی کارروائی کی تیاری کا اشارہ بھی ہو سکتا ہے۔
ایف-22 ریپٹر کی خصوصیات
اطلاعات کے مطابق یہ پہلا موقع ہے کہ امریکہ نے بغیر کسی مشترکہ فوجی مشق یا تربیتی پروگرام کے اپنے طیارے براہِ راست ممکنہ آپریشنل یا جنگی مقاصد کے لیے اسرائیلی سرزمین پر تعینات کیے ہیں۔ یہ اقدام امریکہ اور اسرائیل کے درمیان گہرے ہوتے دفاعی تعاون کی عکاسی کرتا ہے۔ ایف-22 ریپٹر پانچویں نسل کا اسٹیلتھ لڑاکا طیارہ ہے، جسے دنیا کے مہلک ترین اور جدید ترین جنگی طیاروں میں شمار کیا جاتا ہے۔ اس کی نمایاں خصوصیات میں جدید اسٹیلتھ ٹیکنالوجی، سپر کروز صلاحیت اور جدید اسلحہ نظام شامل ہیں، جو اسے دشمن کے ریڈار سے بچتے ہوئے انتہائی درست حملے کرنے کے قابل بناتے ہیں۔
قابل ذکر بات یہ ہے کہ امریکہ نے اس طیارے کو نہ تو اسرائیل اور نہ ہی کسی دوسرے نیٹو ملک کو برآمد کیا ہے، جس سے اس کی اسٹریٹجک اہمیت مزید بڑھ جاتی ہے۔ اس پیش رفت کو مغربی ایشیا کی بدلتی ہوئی جغرافیائی و سیاسی صورتحال کے تناظر میں دیکھا جا رہا ہے، جہاں امریکہ، اسرائیل اور ایران کے درمیان تناؤ برقرار ہے۔
اسرائیلی پارلیمنٹ سے خطاب کریں گے
اپنے دورے کے دوران وزیراعظم مودی اپنے اسرائیلی ہم منصب نیتن یاہو سے ملاقات اور دوطرفہ بات چیت کریں گے۔ اسرائیلی پارلیمنٹ (کنیسٹ) سے خطاب کریں گے اور ہندوستانی تارکین وطن سے بات چیت کریں گے۔ اسرائیل کے لیے روانگی سے قبل اپنے بیان میں وزیر اعظم نے کہا کہ ہندوستان اور اسرائیل کے درمیان مضبوط اور کثیر جہتی اسٹریٹجک شراکت داری ہے جس میں نمایاں ترقی اور پیشرفت ہوئی ہے۔
