af5f927f-57c7-4c44-88d5-9486b7df481d1232026121446.jpg)
ترواننت پورم: مہا کمبھ میلے کے دوران اپنی نیلی بھوری آنکھوں کی وجہ سے سوشل میڈیا پر غیر معمولی توجہ حاصل کرنے والی مونالیسا نے تحفظ کی درخواست کے ساتھ کیرالہ کے ترواننت پورم میں تمپانور پولیس اسٹیشن سے رجوع کیا ہے۔ وہ اپنے بوائے فرینڈ فرمان کے ساتھ تھانے پہنچیں جہاں پولیس نے دونوں سے تفصیلی پوچھ تاچھ کی۔ میڈیا رپورٹس کے مطابق مونالیسا اور فرمان گزشتہ تقریباً ڈیڑھ سال سے ایک دوسرے کے ساتھ رشتہ میں ہیں۔ بتایا جاتا ہے کہ دونوں کی پہلی ملاقات فیس بک کے ذریعے ہوئی تھی جس کے بعد ان کے درمیان رابطہ بڑھتا گیا اور یہ تعلق رشتہ میں تبدیل ہو گیا۔
مونالیسا کے مطابق ان کے والد جئے سنگھ بھوسلے اس رشتے کی مخالفت کر رہے ہیں۔ انہوں نے الزام لگایا کہ مختلف مذاہب سے تعلق رکھنے کی وجہ سے ان کے خاندان کی طرف سے شدید دباؤ اور دھمکیاں دی جا رہی تھیں۔ مونالیسا نے کہا کہ اسی دباؤ کے باعث انہیں اپنا گھر چھوڑنے پر مجبور ہونا پڑا اور وہ اپنے ساتھی کے ساتھ محفوظ جگہ کی تلاش میں کیرالہ پہنچیں۔
پولیس حکام کے مطابق جب مونالیسا سے پوچھا گیا کہ انہوں نے کیرالہ آنے کا فیصلہ کیوں کیا تو انہوں نے بتایا کہ وہ یہاں سماجی اور مذہبی دباؤ سے دور رہتے ہوئے خود کو زیادہ محفوظ محسوس کرتی ہیں۔ پولیس نے ان کی شناخت اور دیگر دستاویزات کی جانچ کی جس سے تصدیق ہوئی کہ وہ قانونی طور پر بالغ ہیں۔ دستاویزات کی تصدیق کے بعد پولیس نے مونالیسا کے والد کو بھی تھانے طلب کیا تاکہ معاملے پر وضاحت حاصل کی جا سکے۔ تاہم چونکہ مونالیسا بالغ ہیں، اس لیے انہیں قانون کے مطابق اپنی زندگی سے متعلق فیصلے کرنے کا حق حاصل ہے۔
پولیس نے تمام پہلوؤں کا جائزہ لینے کے بعد مونالیسا کو اپنے بوائے فرینڈ فرمان کے ساتھ جانے کی اجازت دے دی۔ اس کے ساتھ ہی مقامی انتظامیہ کو بھی مطلع کیا گیا تاکہ جوڑے کی حفاظت کو یقینی بنایا جا سکے اور کسی ممکنہ تنازع سے بچا جا سکے۔ یہ واقعہ سوشل میڈیا پر بھی موضوع بحث بنا ہوا ہے جہاں کئی صارفین نے مونالیسا کے فیصلے پر مختلف ردعمل ظاہر کیے ہیں۔ تاہم پولیس کا کہنا ہے کہ ان کی پہلی ترجیح دونوں افراد کی سلامتی اور قانون کے مطابق کارروائی کو یقینی بنانا ہے۔
 (6)14af301d-1277-49b8-a474-3f1b422b49e112320261218.jpg)
