Sunday, November 22, 2026 | 11 جمادى الآخرة 1448
  • News
  • »
  • فلمیں/ طرززندگی
  • »
  • تلگو فلموں میں کام کرنا چاہتا ہوں : سلمان خان

تلگو فلموں میں کام کرنا چاہتا ہوں : سلمان خان

Reported By: Munsif News Bureau | Edited By: editor | Last Updated: 21 Nov 2026

تلگو فلموں میں کام کرنا چاہتا ہوں  :  سلمان خان

بالی ووڈ سپر اسٹار سلمان خان نے تلگو فلم انڈسٹری میں کام کرنے کی خواہش ظاہر کرتے ہوئے کہا ہے کہ اگر ٹالی ووڈ کے ان کے دوست انہیں کسی فلم میں کام کرنے کی پیشکش کرتے ہیں تو وہ بلا تردد اسے قبول کرلیں گے۔ ان کا کہنا ہے کہ وہ تلگو فلموں میں کام کرنے کے لیے ہمیشہ تیار ہیں۔

حیدرآباد میں ایک خصوصی ملاقات کے دوران سلمان خان سے جب پوچھا گیا کہ وہ تلگو فلم انڈسٹری کے کن بڑے اداکاروں کے ساتھ کام کرنا پسند کریں گے تو انہوں نے فوراً چرنجیوی، وینکٹیش، رام چرن اور جونیئر این ٹی آر کے نام لیے۔ سلمان خان نے کہا کہ ان کے دوست جب بھی انہیں کسی فلم میں شامل ہونے کی دعوت دیں گے، وہ خوشی سے اس پیشکش کو قبول کریں گے۔

اس موقع پر جب ان سے ان کے پسندیدہ تلگو ہیرو کے بارے میں سوال کیا گیا تو سلمان خان نے اپنے مخصوص انداز میں مسکراتے ہوئے جواب دیا کہ وہ خود اپنے پسندیدہ تلگو ہیرو بننا چاہیں گے۔ ان کے اس دلچسپ جواب پر محفل میں قہقہے گونج اٹھے۔واضح رہے کہ سلمان خان کے ٹالی ووڈ ستاروں کے ساتھ خوشگوار تعلقات پہلے سے ہی قائم ہیں۔ وہ چرنجیوی کی فلم ’گاڈ فادر‘ میں خصوصی کردار ادا کرچکے ہیں، جبکہ رام چرن نے سلمان خان کی فلم ’کسی کا بھائی کسی کی جان‘ میں مختصر کردار نبھایا تھا۔ سلمان خان نے تلگو اداکار الو ارجن کی اداکاری کی بھی تعریف کی ہے، خصوصاً فلم ’رادھے‘ کے گیت ’سیٹی مار‘ کے ہندی ورژن کی مقبولیت کے تناظر میں۔

تلگو سنیما کی مقبولیت اب صرف جنوبی ہند تک محدود نہیں رہی بلکہ قومی اور بین الاقوامی سطح پر بھی اس کا دائرہ وسیع ہو رہا ہے۔ ایسے میں سلمان خان جیسے بڑے بالی ووڈ اسٹار کی تلگو فلموں میں کام کرنے کی خواہش ہندی اور جنوبی ہندوستانی فلم انڈسٹری کے درمیان اشتراک کے نئے امکانات پیدا کرسکتی ہے۔تاہم سلمان خان نے فی الحال کسی تلگو فلم یا پروجیکٹ کا اعلان نہیں کیا ہے۔ ان کے بیان سے اتنا ضرور واضح ہوتا ہے کہ مناسب کہانی اور اپنے دوستوں کی پیشکش پر وہ ٹالی ووڈ کا حصہ بننے کے لیے تیار ہیں۔