تلنگانہ میں ریئل اسٹیٹ کے قواعد کی علانیہ خلاف ورزی کرنے والی تعمیری کمپنیوں کے خلاف تلنگانہ رئیل اسٹیٹ ریگولیٹری اتھارٹی نے سخت قدم اٹھایا ہے۔ اتھارٹی نے بتایا کہ بعض پروجیکٹس کے نام پر خریداروں سے کروڑوں روپے وصول کیے گئے مگر مقررہ مدت میں تعمیرات مکمل نہ ہوئیں، فلیٹس اور پلاٹس کی حوالگی میں غیر معمولی تاخیر ہوئی اور وعدہ کی گئی رقوم کی واپسی بھی عمل میں نہ آئی، جس پر کاروائی ناگزیر بن گئی۔ اس ضمن میں اتھارٹی نے متعدد اداروں پر بھاری جرمانے عائد کرتے ہوئے واضح کیا کہ خریداروں کی سرمایہ کاری کے تحفظ اور مارکیٹ میں شفافیت بحال کرنا اس کا اولین مقصد ہے۔
اتھارٹی کے مطابق منچیرول میں بغیر ریرا رجسٹریشن کے ’سنالی دی ایج‘ پروجیکٹ کی تشہیر کرنے پر ’سنالی آئی ٹی پارکس‘ کے خلاف کاروائی کی گئی اور قواعد کی خلاف ورزی پر اس ادارے پر روپے 25 لاکھ جرمانہ عائد کیا گیا۔ اتھارٹی نے حکم دیا کہ یہ رقم 30 دن کے اندر جمع کرائی جائے اور رجسٹریشن حاصل ہونے تک پروجیکٹ سے متعلق ہر قسم کی تشہیر، بُکنگ اور فروخت فوراً روکی جائے۔
اسی طرح اتھارٹی نے اُن کمپنیوں کو بھی ہدایت دی جنہوں نے فلیٹس بروقت نہ دیے اور رِیفنڈ میں کوتاہی برتی۔ فیصلے کے مطابق ’واسوی ریئلٹرز ایل ایل پی‘ خریدار کو روپے 49 لاکھ 50 ہزار اصل زر کے ساتھ سالانہ 10.85 فیصد منافع کے طور پر ادائیگی کرے۔ مزید برآں ’تریپورا کنسٹرکشنز‘ روپے 41 لاکھ 85 ہزار، ’ایس وی ایم آدتیہ ہومز‘ روپے 27 لاکھ 16 ہزار، ’بھون تِیجا انفرا پروجیکٹس‘ روپے 26 لاکھ، ’آدتیہ اسکوائرز‘ روپے 17 لاکھ اور ’بی وی آر انفرا‘ روپے 7 لاکھ اپنے اپنے خریداروں کو واجب الادا رقم سود سمیت واپس کریں۔ اتھارٹی نے وضاحت کی کہ تاخیر سے ادائیگی کی صورت میں بھی سود کی ذمہ داری برقرار رہے گی اور خلاف ورزی پر مزید اقدام ہو سکتا ہے۔
علاوہ ازیں میاں پور کے ’ارین ایمیرلڈ‘ پروجیکٹ میں فلیٹ نمبر 502 کی فوری حوالگی کے لیے ’ارین انفرا‘ کو حکم دیا گیا کہ خریدار کے ساتھ معاہدے کی تمام شرائط بلا تاخیر پوری کی جائیں تاکہ رہائشی حقوق متاثر نہ ہوں۔
تلنگانہ ریرا نے متنبہ کیا کہ اس کے احکامات سے انحراف یا ان کی عدم تعمیل کی صورت میں ریرا قانون کی دفعہ 63 کے تحت اضافی جرمانے اور کڑی قانونی کاروائی عمل میں لائی جائے گی۔ اتھارٹی کے مطابق یہ اقدامات اس لیے کیے گئے ہیں تاکہ ڈویلپرز کی جواب دہی یقینی ہو، منصوبوں کی بروقت تکمیل ہو اور خریداروں کے اعتماد کی بحالی ممکن بنائی جا سکے۔ ماہرین کا کہنا ہے کہ آج جاری کیے گئے احکامات سے مارکیٹ میں نظم و ضبط پیدا ہوگا، جبکہ سرمایہ کاروں کو واضح پیغام ملا ہے کہ قواعد سے انحراف اب مالی اور قانونی دونوں حوالوں سے مہنگا ثابت ہوگا۔







