بہار حکومت کے سابق وزیر اور مکیش ساہنی کے والد جیتن ساہنی کا دربھنگہ میں قتل کردیا گیاہے۔
یہ واقعہ پیر کی آدھی رات میں پیش آیا ہے۔ مقامی لوگوں کو منگل کی صبح اس بات کی جانکاری ہوئی۔
صبح جیسے ہی گھر میں لاش ملی تو پورے علاقہ میں کہرام مچ گیا۔
بتا دیں کہ دربھنگہ کے ایس ایس پی جگناتھ ریڈی نے اس واقعہ کی تصدیق کی ہے۔ ایس ایس پی نے مکیش ساہنی کے والد کے قتل کیس میں دربھنگہ دیہی ایس پی کامیا مشرا کی قیادت میں ایس آئی ٹی تشکیل دی ہے۔
جیتن سہانی کی عمر تقریباً 65 سال تھی۔یہ واقعہ دربھنگہ کے بیرول سب ڈویژن کی افضلہ پنچایت کے سوپول بازار میں واقع ان کے آبائی گھر میں پیش آیا ہے۔
ایک مقامی باشندے پپو نائک نے بتایا کہ جب مکیش ساہنی کے والد کافی دیر تک گھر سے باہر نہیں آئے تو لوگوں نے گھر کے اندر دیکھا۔ وہ گھر میں بستر پر مردہ پڑا تھا۔
لوگوں نے فوری طور پر پولیس کو اس کی اطلاع دی۔ قتل کی وجہ معلوم نہیں ہوسکی ہے۔
لوگوں کا کہنا ہے کہ مکیش کے والد کی کسی سے کوئی دشمنی نہیں تھی۔ وہ گھر میں اکیلا رہتا تھا۔
بیرول کے ایس ڈی پی او منیش چندر چودھری نے کہا کہ ابتدائی تحقیقات سے ایسا لگتا ہے کہ قاتل چوری کی نیت سے گھر میں داخل ہوئے تھے۔ گھر کا سامان باہر بکھرا پڑا تھا۔
پولیس آس پاس کے سی سی ٹی وی کیمروں کو چیک کر رہی ہے۔
واضح رہے کہ مکیش ساہنی وکاسیل انسان پارٹی کے بانی ہیں اور حال ہی میں ہوئے لوک سبھا انتخابات میں انہوں نے تیجسوی یادو کے ساتھ کئی میٹنگوں سے خطاب کیا۔ مکیش ساہنی کی پارٹی نے بہار کی تین لوک سبھا سیٹوں پر بھی الیکشن لڑا تھا۔ مگر پارٹی تینوں جگہوں پر ہارگئی۔