افغانستان نے بھارت کے خلاف ٹی ٹوئنٹی سیریز کے لیے اپنے اسکواڈ کا اعلان کر دیا ہے۔ اگرچہ افغانستان کو تکنیکی طور پر میزبان قرار دیا گیا ہے، تاہم سیریز کے تمام میچ نئی دہلی کے ارون جیٹلی اسٹیڈیم میں کھیلے جائیں گے۔ افغان ٹیم کی قیادت ابراہیم زدران کریں گے، جبکہ تیز گیند باز نوین الحق کی بھی اسکواڈ میں واپسی ہوئی ہے۔ ٹیم میں رحمن اللہ گرباز، محمد نبی، راشد خان، نور احمد، مجیب الرحمان اور عظمت اللہ عمر زئی جیسے اہم کھلاڑی بھی شامل ہیں۔بھارت اور افغانستان کے درمیان ٹی ٹوئنٹی سیریز کا آغاز 13 ستمبر سے ہوگا۔ دوسرا مقابلہ 15 ستمبر جبکہ تیسرا اور آخری میچ 17 ستمبر کو کھیلا جائے گا۔ تینوں میچ ارون جیٹلی اسٹیڈیم، نئی دہلی میں ہوں گے۔
افغانستان نے ٹیم میں ان کھلاڑیوں کو شامل کیا ہے۔ ابراہیم زدران (کپتان)، رحمن اللہ گرباز، نور رحمان، صدیق اللہ اتل، درویش رسولی، عظمت اللہ عمرزئی، گلبدین نائب، محمد نبی، راشد خان، ننگیالیہ خروٹے، نور احمد، مجیب الرحمان، عبداللہ فاروق، فضل الحق فاروقی، عبدالرحمن اور نوین الحق کو اسکواڈ میں شامل کیا گیا ہے۔
بھارت اور افغانستان کے درمیان اس سے قبل دو طرفہ ٹی ٹوئنٹی سیریز صرف ایک بار ہوئی ہے۔ جنوری 2024 میں دونوں ٹیمیں تین میچوں کی سیریز میں آمنے سامنے آئی تھیں، جس میں بھارت نے 3-0 سے کامیابی حاصل کی تھی۔ سیریز کا آخری مقابلہ انتہائی سنسنی خیز رہا تھا اور دو سپر اوورز کے بعد بھارت نے کامیابی حاصل کی تھی۔ اب دونوں ٹیمیں ایک بار پھر ٹی ٹوئنٹی فارمیٹ میں آمنے سامنے ہوں گی۔ ہندوستانی ٹیم کے اسکواڈ کا اعلان ابھی باقی ہے۔ نوجوان کھلاڑیوں کو مسلسل مواقع دیے جانے کے باعث ٹیم میں کچھ نئی تبدیلیوں کا امکان بھی ظاہر کیا جا رہا ہے۔
اس دوران نوجوان بلے باز ویبھو سوریاونشی پر بھی خاص نظر ہوگی، جو تیزی سے بھارتی ٹی ٹوئنٹی کرکٹ میں اپنی جگہ مضبوط کر رہے ہیں۔ سیریز افغانستان کے لیے مضبوط بھارتی ٹیم کے خلاف اپنی تیاری جانچنے کا اہم موقع ہوگی، جبکہ بھارت بھی نوجوان کھلاڑیوں کو آزمانے کے لیے اس سیریز سے فائدہ اٹھا سکتا ہے۔
e43d8262-bf78-4027-9fbd-bb7639062821258202616318.png)
23d12628-8161-46a1-b713-267daa81c896258202615929.png)
3aa6441c-65b6-41d7-a35d-858d6217460f258202616658.png)