راجستھان کے ضلع بیکانیر میں پاک-بھارت بین الاقوامی سرحد کے قریب پولیس نے ایک بڑی کارروائی کرتے ہوئے 10 کلوگرام ہیروئن، 11 غیر ملکی ہتھیار، 22 میگزین اور 100 زندہ کارتوس برآمد کر لیے۔ کارروائی کے دوران ایک مشتبہ ملزم کو بھی گرفتار کیا گیا، جو مبینہ طور پر اسمگل شدہ کھیپ وصول کرنے کے لیے موقع پر پہنچا تھا۔
پولیس کے مطابق یہ کارروائی ضلع اسپیشل ٹیم (DST) اور کھاجووالا پولیس نے مشترکہ طور پر "آپریشن شاک ویو" کے تحت انجام دی۔ حکام کا کہنا ہے کہ ابتدائی تحقیقات میں انکشاف ہوا ہے کہ برآمد ہونے والی ہیروئن افغانستان سے تعلق رکھتی ہے اور اسے ڈرون کے ذریعے پاکستان کی جانب سے بھارتی حدود میں گرایا گیا تھا۔
گرفتار ملزم کی شناخت وریندر سنگھ کے نام سے ہوئی ہے۔ پولیس نے کارروائی کے دوران اس کے زیر استعمال ایک موٹر سائیکل بھی ضبط کر لی ہے، جسے اسمگل شدہ سامان کی نقل و حمل کے لیے استعمال کیا جانا تھا۔
تفتیشی حکام کے مطابق اسمگلروں کا منصوبہ برآمد شدہ ہیروئن اور اسلحہ کو پنجاب منتقل کرنے کا تھا، تاہم بروقت انٹیلی جنس اطلاع اور پولیس کی فوری کارروائی کے باعث یہ منصوبہ ناکام بنا دیا گیا۔
پولیس نے مقدمہ درج کر کے مزید تحقیقات شروع کر دی ہیں تاکہ اسمگلنگ کے اس نیٹ ورک سے جڑے دیگر افراد اور سرحد پار موجود رابطوں کا بھی سراغ لگایا جا سکے۔ حکام کا کہنا ہے کہ سرحدی علاقوں میں نگرانی مزید سخت کر دی گئی ہے تاکہ مستقبل میں اس نوعیت کی اسمگلنگ کی کوششوں کو ناکام بنایا جا سکے۔
