گوا سے دہلی جانے والی انڈیگو کی ایک پرواز کو ٹیک آف کے چند ہی منٹ بعد تکنیکی خرابی کے باعث ہنگامی طور پر واپس موڑنا پڑا۔ طیارہ تقریباً 14 ہزار فٹ کی بلندی پر پہنچا تھا کہ انجن میں خرابی کا پتہ چلا، جس کے بعد فوری طور پر مکمل ایمرجنسی کا اعلان کر دیا گیا۔ میڈیا رپورٹ کے مطابق انڈیگو کی پرواز 6E 2102 منگل کی صبح گوا کے موپا ہوائی اڈے سے دہلی کے لیے روانہ ہوئی تھی۔ تاہم، اڑان بھرنے کے کچھ ہی دیر بعد طیارے کے ایک انجن میں تکنیکی خرابی کی اطلاع سامنے آئی، جس کے بعد پائلٹوں نے احتیاطی اقدام کے طور پر طیارے کو واپس موپا ایئرپورٹ کی جانب موڑ دیا۔
14 ہزار فٹ کی بلندی پر خرابی کا پتہ چلا
اطلاعات کے مطابق، پرواز صبح 9 بج کر 16 منٹ پر گوا کے موپا ہوائی اڈے سے دہلی کے لیے روانہ ہوئی تھی۔ طیارہ تقریباً 14 ہزار فٹ کی بلندی پر پہنچا ہی تھا کہ انجن میں خرابی کا پتا چلا۔ صورتحال کی سنگینی کو دیکھتے ہوئے ایئر ٹریفک کنٹرول نے صبح 9 بج کر 30 منٹ پر مکمل ایمرجنسی کا اعلان کر دیا۔ اس کے بعد پائلٹوں نے فوری فیصلہ کرتے ہوئے طیارے کو واپس منوہر انٹرنیشنل ایئرپورٹ، موپا کی جانب موڑ دیا۔ تقریباً 9 بج کر 50 منٹ پر طیارے نے موپا ہوائی اڈے پر بحفاظت ہنگامی لینڈنگ کی۔ تمام مسافروں اور عملے کو محفوظ بتایا گیا ہے۔
انڈیگو نے تکنیکی مسئلے کی تصدیق کی
انڈیگو نے واقعے کے حوالے سے جاری اپنے بیان میں کہا کہ پرواز 6E 2102، جو شمالی گوا سے دہلی جا رہی تھی، کو ٹیک آف کے فوراً بعد ایک تکنیکی مسئلے کا سامنا کرنا پڑا۔ ایئرلائن کے مطابق، صورتحال کی اطلاع فوری طور پر متعلقہ حکام کو معیاری آپریٹنگ طریقہ کار کے تحت دی گئی۔ اس کے بعد پائلٹوں نے تمام ضروری حفاظتی اقدامات کرتے ہوئے طیارے کو واپس موپا کے منوہر انٹرنیشنل ایئرپورٹ پر محفوظ طریقے سے اتار لیا۔
مسافروں کے لیے متبادل انتظامات
واقعے کے بعد طیارے کی تکنیکی جانچ اور ضروری دیکھ بھال کا عمل جاری ہے۔ انڈیگو کے مطابق، تمام ضروری معائنے اور منظوری ملنے کے بعد ہی طیارے کو دوبارہ سروس میں شامل کیا جائے گا۔ایئرلائن نے مسافروں کو پیش آنے والی دشواری پر افسوس کا اظہار کرتے ہوئے کہا کہ انہیں باقاعدگی سے صورتحال سے آگاہ رکھا جا رہا ہے اور ان کی منزل تک پہنچانے کے لیے متبادل انتظامات کیے گئے ہیں۔ مسافروں کے لیے ریفریشمنٹ کا بھی انتظام کیا گیا ہے۔ انڈیگو نے واضح کیا کہ اس کے لیے مسافروں، عملے اور طیاروں کی حفاظت سب سے اہم ترجیح ہے اور ایسے کسی بھی تکنیکی مسئلے سے نمٹنے کے لیے مقررہ حفاظتی طریقہ کار پر سختی سے عمل کیا جاتا ہے۔
