ملک کے مختلف حصوں میں شدید گرمی اور ہیٹ ویو کی صورتحال برقرار ہے جس کے باعث عوام کو سخت مشکلات کا سامنا کرنا پڑ رہا ہے۔ ہندوستانی محکمہ موسمیات کے مطابق شمالی اور وسطی ہندوستان کے کئی علاقوں میں اس ہفتے بھی شدید گرمی کا سلسلہ جاری رہنے کا امکان ہے، جبکہ بعض ریاستوں میں بھاری بارش اور گرج چمک کے ساتھ طوفان کی پیش گوئی کی گئی ہے۔
محکمہ موسمیات نے آسام، میگھالیہ اور اروناچل پردیش میں 21 مئی تک ہلکی بارش کی پیش گوئی کی ہے۔ اس کے بعد 22 سے 25 مئی کے دوران ان علاقوں میں موسلادھار بارش ہوسکتی ہے۔ 23 اور 24 مئی کیلئے ان ریاستوں میں بھاری بارش کا الرٹ بھی جاری کیا گیا ہے۔
مغربی بنگال میں 19 سے 25 مئی کے درمیان گرج چمک کے ساتھ بارش اور 40 سے 50 کلومیٹر فی گھنٹہ کی رفتار سے تیز ہوائیں چلنے کا امکان ظاہر کیا گیا ہے۔ اسی طرح بہار، جھارکھنڈ اور اڈیشہ کے بعض علاقوں میں دھول بھری آندھی اور شدید طوفان آسکتا ہے، جہاں ہواؤں کی رفتار 50 سے 60 کلومیٹر فی گھنٹہ تک پہنچ سکتی ہے۔
کیرالہ، مہے اور لکشدیپ میں بھی 19 سے 25 مئی کے دوران بارش کی پیش گوئی کی گئی ہے۔ کرناٹک، ساحلی آندھرا پردیش اور رائلسیما میں 19 سے 23 مئی کے درمیان شدید گرج چمک کے ساتھ طوفان کا خطرہ ظاہر کیا گیا ہے۔ اس کے علاوہ کونکن، گوا اور مدھیہ مہاراشٹرا میں ہلکی بارش ہوسکتی ہے۔
پہاڑی علاقوں جموں و کشمیر، ہماچل پردیش اور اتراکھنڈ میں بھی گرج چمک کے ساتھ ہلکی سے درمیانی بارش متوقع ہے۔ محکمہ موسمیات نے خبردار کیا ہے کہ جموں و کشمیر میں 19 اور 21 مئی کو شدید گرج چمک کے ساتھ طوفان آسکتا ہے۔
دوسری جانب دہلی، اتر پردیش، پنجاب، ہریانہ اور چندی گڑھ کے میدانی علاقوں میں تیز اور گرد آلود ہوائیں چلنے کی پیش گوئی کی گئی ہے۔ محکمہ موسمیات کے مطابق ان علاقوں میں گرمی سے فوری راحت ملنے کے امکانات کم ہیں۔
آئی ایم ڈی نے اتر پردیش، مدھیہ پردیش، پنجاب، ہریانہ، دہلی، راجستھان، ودربھ، چھتیس گڑھ، تلنگانہ اور اڈیشہ کیلئے شدید ہیٹ ویو کی وارننگ جاری کی ہے۔ ماہرین نے عوام کو دوپہر کے وقت غیر ضروری طور پر باہر نکلنے سے گریز کرنے، زیادہ پانی پینے اور احتیاطی تدابیر اختیار کرنے کا مشورہ دیا ہے۔
