ایران نے ہفتہ کے روز ایک بار پھر آبنائے ہرمز(Strait of Hormuz) کو بند کرنے کا اعلان کیا ہے۔ ایرانی میڈیا کے مطابق ایران نے یہ قدم امریکہ اور اسرائیل پر سمجھوتے (MoU) کی خلاف ورزی کا الزام لگاتے ہوئے اٹھایا ہے۔ایران کی اعلیٰ مشترکہ فوجی کمان خاتم الانبیاء سینٹرل ہیڈکوارٹرز نے کہا کہ یہ فیصلہ امریکہ اور اسرائیل کی جانب سے جنگ بندی کے بعد کیے گئے معاہدے کی پہلی شق کی "واضح خلاف ورزی" اور جنوبی لبنان میں جنگ بندی کی مسلسل خلاف ورزیوں کے جواب میں کیا گیا ہے۔
ایرانی نیم سرکاری خبر رساں ادارے مہر نیوز کے مطابق فوجی کمان نے کہا کہ امریکہ نے جنگ کے خاتمے سے متعلق معاہدے کی اپنی ذمہ داری پوری نہیں کی، جبکہ اسرائیل نے لبنان میں حملے جاری رکھے۔ اسی وجہ سے ایران آبنائے ہرمز کو بحری جہازوں کی آمد و رفت کے لیے بند کر رہا ہے۔
ایران اور امریکہ کے درمیان 18 جون کو ایک مفاہمتی یادداشت (MoU) پر دستخط ہوئے تھے۔ یہ معاہدہ ایرانی صدر مسعود پزشکیان اور امریکی صدر ڈونلڈ ٹرمپ کے درمیان ڈیجیٹل طریقے سے مکمل ہوا، جس کے لیے کوئی تقریب منعقد نہیں کی گئی۔
مہر نیوز کے مطابق معاہدے کی پہلی شق میں ایران، امریکہ اور ان کے اتحادیوں کے درمیان تمام محاذوں پر فوجی کارروائیاں فوری اور مستقل طور پر ختم کرنے کی بات شامل تھی۔ اس کے علاوہ فریقین نے مستقبل میں کسی بھی فوجی کارروائی یا طاقت کے استعمال کی دھمکی نہ دینے کا وعدہ کیا تھا۔
اس سے قبل جمعہ کے روز ایران نے آبنائے ہرمز سے گزرنے والے بحری جہازوں کے لیے نئے قوانین متعارف کرائے تھے۔ ان قوانین کے تحت جہازوں کو پہلے سے رجسٹریشن، اجازت نامہ اور انشورنس حاصل کرنا ضروری قرار دیا گیا تھا۔
یہ اقدامات امریکہ اور ایران کے درمیان طے پانے والے معاہدے کے بعد کیے گئے تھے، جس کا مقصد تین ماہ سے زائد عرصے کے تنازع کے بعد اس اہم سمندری راستے پر تجارتی جہاز رانی بحال کرنا تھا۔امریکی سینٹرل کمانڈ نے کہا کہ امریکی افواج نے ایرانی بندرگاہوں اور ساحلی علاقوں میں آنے اور جانے والی بحری ٹریفک کی ناکہ بندی ختم کر دی ہے۔
،امریکی کمانڈ نے سوشل میڈیا پلیٹ فارم ایکس پر کہا
"امریکی افواج ایرانی بندرگاہوں سے آنے یا جانے والے جہازوں کی نقل و حرکت میں رکاوٹ نہیں ڈال رہیں۔ تمام بحری ناکہ بندی کی کارروائیاں ختم کر دی گئی ہیں۔"تاہم امریکی جنگی جہاز علاقے میں موجود رہیں گے تاکہ یہ یقینی بنایا جا سکے کہ معاہدے کی تمام شرائط پر عمل ہو رہا ہے۔
