آندھرا پردیش کے سری ستیہ سائی ضلع میں ایک افسوسناک واقعہ پیش آیا ہے جہاں کدری منڈل کے ایک گاؤں میں زوردار دھماکے کے نتیجے میں کم از کم 5 افراد ہلاک جبکہ 20 سے زائد افراد زخمی ہو گئے۔دھماکے سے مکان مکمل طور پر زمین بوس ہو گیا۔ گیس کے دھماکے سے قریبی مکانات کو معمولی نقصان پہنچا۔
ڈیٹونیٹرز پھٹ پڑے
تفصیلات کے مطابق یہ حادثہ کماراونڈلا پلی گاؤں میں ایک مزدور کے گھر میں پیش آیا، جہاں غیر قانونی طور پر ڈیٹونیٹرز اور گیس سلنڈر ذخیرہ کیے گئے تھے۔ منگل کے روز اچانک چار ڈیٹونیٹرز پھٹ گئے جس کے باعث آگ بھڑک اٹھی اور قریب موجود گیس سلنڈروں کو اپنی لپیٹ میں لے لیا۔
دھماکہ میں 5 افراد ہلاک
اس کے بعد ایک زوردار دھماکہ ہوا جس سے مکان مکمل طور پر تباہ ہو گیا۔ دھماکے کی شدت اس قدر زیادہ تھی کہ پانچ افراد موقع پر ہی جان کی بازی ہار گئے۔
ریسکیو ٹیمیں موقع پر پہنچیں
حادثے کی اطلاع ملتے ہی فائر بریگیڈ اور پولیس کی ٹیمیں موقع پر پہنچ گئیں اور فوری طور پر ریسکیو آپریشن شروع کیا گیا۔ زخمیوں کو فوری طور پر کدیری کے سرکاری اسپتال منتقل کیا گیا، جہاں ڈاکٹروں کے مطابق 12 افراد کی حالت تشویشناک بتائی جا رہی ہے۔اس واقعے سے علاقے میں شدید خوف و ہراس پھیل گیا ہے۔ حکام نے واقعے کی مکمل تحقیقات شروع کر دی ہیں تاکہ یہ معلوم کیا جا سکے کہ ڈیٹونیٹرز غیر قانونی طور پر کیوں اور کس مقصد کے لیے رکھے گئے تھے۔
ریاستی وزیر نے کیا دکھ کا اظہار
ریاستی وزیر ستیہ کمار نے اس حادثے پر گہرے دکھ کا اظہار کرتے ہوئے زخمیوں کو بہترین طبی سہولیات فراہم کرنے کی ہدایت دی ہے۔یہ واقعہ ایک بار پھر اس بات کی نشاندہی کرتا ہے کہ خطرناک اشیاء کی غیر قانونی ذخیرہ اندوزی کس قدر جان لیوا ثابت ہو سکتی ہے، جس کے خلاف سخت کارروائی کی ضرورت ہے۔
