ملک بھر میں اگلے ہفتے سے ووٹر لسٹوں کے خصوصی نظر ثانی (SIR) کا عمل شروع ہو سکتا ہے۔ الیکشن کمیشن نے اس کی تیاریاں مکمل کر لی ہیں اور جلد ہی اس کا پہلا مرحلہ شروع ہو سکتا ہے۔ ابتدا میں 10 سے 15 ریاستوں میں یہ عمل ہوگا، جسے آہستہ آہستہ پورے ملک میں نافذ کیا جائے گا۔ سب سے پہلے ان ریاستوں میں SIR ہوگا جہاں 2026 میں اسمبلی انتخابات ہونے ہیں، تاکہ وہاں کام جلد مکمل ہو سکے۔
اگلے ہفتے تک سرکاری اعلان ہو سکتا ہے:
خبر رساں ایجنسی PTI کے مطابق، آسام، تمل ناڈو، پڈوچیری، کیرالہ اور مغربی بنگال میں اگلے سال اسمبلی انتخابات ہونے ہیں۔ اس لیے ان ریاستوں میں سب سے پہلے SIR کا عمل کیا جائے گا۔ عہدیداروں نےبتایا کہ الیکشن کمیشن اگلے ہفتے تک SIR کے ابتدائی مرحلے کا اعلان کر سکتا ہے، جس میں 15 ریاستیں شامل ہوں گی۔ جن علاقوں میں مقامی اداروں کے انتخابات جاری ہیں یا ہونے والے ہیں، وہاں فی الحال یہ عمل نہیں کیا جائے گا۔
الیکشن کمیشن نے میٹنگیں کیں:
الیکشن کمیشن نے ریاستوں کے چیف الیکشن آفیسرز (CEOs) کے ساتھ میٹنگیں کی ہیں۔ کئی ریاستوں نے پچھلے SIR کے بعد شائع شدہ ووٹر لسٹیں اپنی ویب سائٹس پر اپ لوڈ کر دی ہیں۔ دہلی کی CEO ویب سائٹ پر 2008 کی اور اتراکھنڈ نے 2006 کی ووٹر لسٹ اپ لوڈ کی ہے۔ ان ریاستوں میں آخری بار انہی سالوں میں SIR کا عمل ہوا تھا۔ واضح رہے کہ پچھلے SIR کا سال نئے عمل کے لیے کٹ آف کے طور پر کام کرتا ہے۔
تمل ناڈو میں ایک ہفتے کے اندر عمل شروع ہوگا:
الیکشن کمیشن نے 24 اکتوبر کو مدراس ہائی کورٹ کو بتایا کہ تمل ناڈو میں SIR کا عمل ایک ہفتے کے اندر شروع ہوگا۔ یہ معلومات سابق AIADMK رکن اسمبلی بی ستیہ نارائنن کی دائر کردہ درخواست کی سماعت کے دوران دی گئیں، جس میں انہوں نے الیکشن کمیشن کو ٹی نگر انتخابی حلقے کے 229 پولنگ اسٹیشنوں کا مکمل اور شفاف جائزہ لینے کی ہدایت دینے کا مطالبہ کیا تھا۔ کمیشن نے کہا کہ اس کے بعد ستیہ نارائنن کی شکایت کا مؤثر حل نکل آئے گا۔
بہار میں عمل مکمل ہو چکا ہے:
بہار میں اسمبلی انتخابات سے قبل SIR کا عمل مکمل ہو چکا ہے۔ 24 جون کو شروع ہونے والے اس عمل کے تحت گھر گھر جا کر ووٹروں کی تصدیق کی گئی، پھر دستاویزات جمع کیے گئے اور مسودہ فہرست شائع کی گئی۔ عمل شروع ہونے سے قبل بہار میں 7.8 کروڑ ووٹر تھے، جن میں سے تقریباً 65 لاکھ کے نام کاٹ دیے گئے ہیں۔بہار میں اس عمل پر کافی سیاسی تنازع بھی ہوا تھا۔
