اتر پردیش کے شہر رام پور میں قائم ایم پی-ایم ایل اے عدالت نے سماج وادی پارٹی کے سینئر لیڈر اعظم خان کو 2019 کے لوک سبھا انتخابی مہم کے دوران دیے گئے متنازع بیان کے معاملے میں مجرم قرار دیتے ہوئے دو سال قید کی سزا سنائی ہے۔ عدالت نے ان پر 20 ہزار روپے جرمانہ بھی عائد کیا ہے۔
یہ مقدمہ تقریباً سات سال قبل ایک انتخابی روڈ شو کے دوران دیے گئے بیان سے متعلق تھا، جس میں اعظم خان نے اس وقت کے ضلع مجسٹریٹ اور دیگر انتظامی افسران کے بارے میں متنازع ریمارکس کیے تھے۔ ان کے بیان کی ویڈیو سوشل میڈیا پر تیزی سے وائرل ہوئی تھی۔
وائرل ویڈیو میں اعظم خان کو یہ کہتے ہوئے سنا گیا تھا کہ عوام ان “کلیکٹروں اور ایسے افسران” سے خوفزدہ نہ ہوں کیونکہ وہ صرف تنخواہ لینے والے ملازم ہیں۔ انہوں نے سابق وزیر اعلیٰ مایاوتی کے دور کا حوالہ دیتے ہوئے یہ بھی کہا تھا کہ اعلیٰ افسران کو جوتے صاف کرتے دیکھا گیا تھا، اور انتخابات کے بعد بھی افسران سے ایسا ہی کام لیا جائے گا۔
اس بیان کے بعد ان کے خلاف الیکشن ماڈل ضابطہ اخلاق کی خلاف ورزی اور اشتعال انگیز تقریر دینے کے الزام میں مقدمہ درج کیا گیا تھا۔ بھوٹ تھانے میں ایف آئی آر درج ہونے کے بعد پولیس نے اس معاملے میں چارج شیٹ عدالت میں داخل کی تھی۔ طویل سماعت کے بعد عدالت نے اب اپنا فیصلہ سنایا ہے۔
اعظم خان اس وقت پہلے ہی رام پور جیل میں بند ہیں۔ ان کے بیٹے عبداللہ اعظم بھی جیل میں قید ہیں۔ دونوں کے خلاف دو پین کارڈ رکھنے کے معاملے میں قانونی کارروائی ہوئی تھی، جس میں عدالت نے انہیں سات سال قید کی سزا سنائی تھی۔
سیاسی مبصرین کے مطابق حالیہ فیصلہ اعظم خان کے لیے ایک اور بڑا قانونی اور سیاسی دھچکا ثابت ہو سکتا ہے، کیونکہ وہ پہلے ہی متعدد مقدمات کا سامنا کر رہے ہیں۔
