راجستھان کے چتور گڑھ ضلع سے ایک چونکا دینے والا واقعہ سامنے آیا ہے۔ جہاں ایک خاتون نے مبینہ طور پر اپنے شوہر کو کلہاڑی کے وار کر کے ہلاک کر دیا۔ پولیس نے بتایا کہ شوہر کو قتل کرنے کے بعد خاتون نے کنویں میں چھلانگ لگا کر خودکشی کی کوشش کی۔ تاہم گاؤں والوں نے اسے بچا لیا۔ پولیس نے بتایا کہ یہ واقعہ راوت بھاٹا پولیس اسٹیشن کے تحت تملاو گاؤں میں پیش آیا۔ پولیس کے مطابق گاؤں والوں نے ملزم خاتون کو کنویں سے نکالا جسکے بعد پولیس نے انہیں اپنی حراست میں لے لیا۔
شوہر کو قتل کرنے کے بعد خاتون نے کنویں میں چھلانگ لگا دی:
ڈپٹی سپرنٹنڈنٹ آف پولیس شنکر لال مینا نے بتایا کہ ملزم لاڈ بائی نے اپنے شوہر موہن گرجر (45) پر کلہاڑی سے حملہ کیا جس سے وہ موقع پر ہی ہلاک ہوگیا۔ انہوں نے بتایا کہ اپنے شوہر کو قتل کرنے کے بعد لاڈ بائی نے بنجارہ بستی کے قریب ایک کنویں میں چھلانگ لگا دی۔ اس نے بتایا کہ گاؤں والے جائے وقوعہ پر پہنچے اور اسے رسی کی مدد سے باہر نکالا۔ پولیس نے بتایا کہ ابتدائی معلومات سے پتہ چلتا ہے کہ خاتون گزشتہ کچھ دنوں سے ذہنی طور پر پریشان تھی۔ پولیس نے بتایا کہ ایک موبائل فرانزک ٹیم کو جائے وقوعہ پر بلایا گیا اور لاش کو پوسٹ مارٹم کے لیے بھیج دیا گیا۔ مینا نے کہا کہ پولیس ہر زاویے سے کیس کی تحقیقات کر رہی ہے۔
پالی میں ایک شخص نے خودکشی کرلی:
ایک اور واقعہ میں، پالی ضلع میں ایک 35 سالہ شخص نے سر میں گولی مار کر خودکشی کر لی۔ پولیس نے بتایا کہ یہ واقعہ باغی نگر تھانہ علاقے میں پیش آیا، جہاں کھوکھرا گاؤں کے رہنے والے رام لال نے سر میں گولی مار کر خودکشی کرلی۔ ایڈیشنل سپرنٹنڈنٹ آف پولیس وپن کمار شرما نے بتایا کہ اس خاندان نے فصلوں کی بوائی کے لیے زمین لیز پر دی تھی اور وہ فارم پر بنی دو جھونپڑیوں میں رہ رہے تھے۔ پولیس کے مطابق رام لال کی ماں نے اسے صبح چائے کے لیے بلایا، لیکن اس نے کوئی جواب نہیں دیا۔ جب وہ کافی دیر تک واپس نہ آیا تو وہ جھونپڑی میں گئی اور اسے مردہ پایا۔ اہل خانہ نے پولیس کو اطلاع دی۔
