ریاست تمل ناڈو سے شارجہ جانے والے ایئر انڈیا ایکسپریس طیارے میں گزشتہ کل 11 اکتوبر جمعہ کو تکنیکی خرابی کے باعث طیارے کی ہنگامی لینڈنگ کی گئی۔
طیارے میں 140 مسافر سوار تھے۔ طیارہ کافی دیر تک ہوا میں چکر لگاتا رہا ،فلائٹ نے 5:40 بجے تمل ناڈو کے تروچیراپلی سے اڑان بھری پھرتقریباً 8:15 بجے اسی ہوائی اڈے پر اتری۔
ایئر انڈیا ایکسپریس کی پرواز نمبر IX 613 نے تریچی ہوائی اڈے سے جیسے ہی ٹیک آف کیا، پائلٹ کو لینڈنگ گیئر کے ہائیڈرولک سسٹم میں خرابی کا پتہ چلا۔
اس کے بعد ہنگامی لینڈنگ کی اجازت مانگی گئی۔ پائلٹ نے ایندھن کم کرنے کے لیے دو گھنٹے سے زائد وقت تک فضا ءمیں چکر لگایا، اس دوران مسافروں میں خوف و ہراس پھیل گیا ۔طیارے میں سوار مسافروں کی جانیں ہوا میں اٹکی رہیں۔
جس وقت جہاز ہوا میں تھا، اس کے پہیے اندر نہیں گئے، جس کی وجہ سے طیارے کو چلانے میں مشکلات کا سامنا کرنا پڑا۔ اس لیے ایندھن ختم ہونے کے بعد طیارے کو لینڈ کرنے کا منصوبہ بنایا گیا۔
تا ہم تقریباً تین گھنٹے تک ہوا میں چکر لگانے کے بعد پائلٹ نے طیارے کی بحفاظت لینڈنگ کی۔اور 140 مسافروں کو بحفاظت نکال لیا گیا۔