محکمہ موسمیات (آئی ایم ڈی) نے شمالی بنگال کے ذیلی ہمالیائی علاقوں میں پیر تک انتہائی موسلا دھار بارش کا الرٹ جاری کرتے ہوئے عوام اور مقامی انتظامیہ کو احتیاط برتنے کی ہدایت دی ہے۔ مسلسل بارش کے باعث کئی علاقوں میں معمولات زندگی متاثر ہوئے ہیں، جبکہ دریاؤں کی سطح آب میں مسلسل اضافہ ریکارڈ کیا جا رہا ہے۔
محکمہ موسمیات کے مطابق دارجلنگ، کالمپونگ، جلپائی گوڑی اور علی پور دوار اضلاع میں ایک یا دو مقامات پر انتہائی شدید بارش جبکہ متعدد علاقوں میں موسلا دھار بارش ہونے کا امکان ہے۔ مسلسل بارش کے پیش نظر پہاڑی علاقوں میں لینڈ سلائیڈنگ اور میدانی علاقوں میں نشیبی بستیوں کے زیر آب آنے کا خدشہ ظاہر کیا گیا ہے۔
حکام نے بتایا کہ رات بھر جاری بارش کے باعث دریاؤں کے پانی کی سطح میں اضافہ دیکھا گیا ہے اور ضلعی انتظامیہ صورتحال پر مسلسل نظر رکھے ہوئے ہے تاکہ کسی بھی ہنگامی صورتحال سے فوری طور پر نمٹا جا سکے۔
آئی ایم ڈی کے مطابق تیستا، جلدھاکا، ڈائنا، لیش اور گھیش دریاؤں میں پانی کی سطح مسلسل بلند ہو رہی ہے، جس کے باعث نشیبی علاقوں میں سیلاب جیسی صورتحال پیدا ہونے کا خدشہ بڑھ گیا ہے۔
محکمہ موسمیات کے بلیٹن کے مطابق گزشتہ 24 گھنٹوں کے دوران صبح 8:30 بجے تک علی پور میں ریاست کی سب سے زیادہ 16 سینٹی میٹر بارش ریکارڈ کی گئی۔
اس کے علاوہ دارجلنگ کے سیووک میں 12 سینٹی میٹر، علی پور دوار کے رائدک ٹی اسٹیٹ میں 12 سینٹی میٹر، ہسیمارا میں 8 سینٹی میٹر، فلاکاٹا میں 7 سینٹی میٹر اور جلپائی گوڑی کے نویرانودی ٹی اسٹیٹ میں 6 سینٹی میٹر بارش ریکارڈ کی گئی۔
محکمہ موسمیات نے خبردار کیا ہے کہ شمالی بنگال میں 2 جولائی تک شدید بارش کا سلسلہ جاری رہ سکتا ہے، جبکہ جنوبی بنگال کے کئی اضلاع میں 3 جولائی تک گرج چمک، تیز ہواؤں اور بارش کا امکان برقرار رہے گا۔
انتظامیہ نے شہریوں، خصوصاً پہاڑی اور نشیبی علاقوں میں رہنے والے افراد کو غیر ضروری سفر سے گریز کرنے، دریا کے کناروں سے دور رہنے اور موسمی حالات سے متعلق سرکاری ہدایات پر عمل کرنے کی اپیل کی ہے۔ ساتھ ہی متعلقہ محکموں کو ممکنہ لینڈ سلائیڈنگ، سیلاب اور دیگر ہنگامی حالات سے نمٹنے کے لیے الرٹ رہنے کی ہدایت دی گئی ہے۔
162f76c8-2e80-47ae-a215-d10079a2c28b286202618956.jpeg)