بھارت نے غیر ملکی شراکت ریگولیشن ایکٹ (FCRA) ترمیمی بل 2026 پر امریکی قانون ساز ریلی مور کے اعتراضات کو مسترد کرتے ہوئے واضح کیا ہے کہ یہ مکمل طور پر بھارت کا اندرونی معاملہ ہے۔ وزارت خارجہ (MEA) نے کہا کہ ملک سے متعلق قانون سازی کا اختیار صرف بھارتی پارلیمنٹ کے پاس ہے اور کسی بیرونی ملک کو اس میں مداخلت کا حق حاصل نہیں۔ وزارت خارجہ کے ترجمان رندھیر جیسوال نے ہفتہ وار پریس بریفنگ میں کہا کہ حکومت نے امریکی قانون ساز کے بیانات کا نوٹس لیا ہے، تاہم ایف سی آر اے سے متعلق قانون سازی بھارت کا داخلی معاملہ ہے۔ انہوں نے یہ بھی یاد دلایا کہ امریکہ سمیت دنیا کے کئی ممالک غیر ملکی فنڈز کی وصولی اور استعمال پر سخت قوانین نافذ کرتے ہیں، اس لیے بھارت کے اقدامات پر سوال اٹھانا مناسب نہیں۔
رندھیر جیسوال نے کہا، ہندوستان سے متعلق قانون سازی کے معاملات کا فیصلہ ہماری پارلیمنٹ کرتی ہے۔ امریکہ خود بھی بیرون ملک سے آنے والے فنڈز پر سخت نگرانی رکھتا ہے، اس لیے بھارت کے اقدامات پر اعتراض بے بنیاد ہے۔ یہ ردعمل امریکی کانگریس کے رکن ریلی مور کے اس بیان کے بعد سامنے آیا جس میں انہوں نے مجوزہ ایف سی آر اے ترمیمی بل 2026 کو عیسائی برادری کے خلاف قرار دیا تھا۔ انہوں نے دعویٰ کیا کہ اگر یہ بل منظور ہو گیا تو اس سے حکومت کو گرجا گھروں اور مذہبی خیراتی اداروں پر زیادہ کنٹرول حاصل ہو جائے گا، جو بھارت اور امریکہ کے تعلقات میں ایک اہم مسئلہ بن سکتا ہے۔
ریلی مور نے سوشل میڈیا پلیٹ فارم X پر اپنی پوسٹ میں کہا کہ ہندوستان میں عیسائی برادری کی صدیوں پرانی تاریخ ہے، لیکن مجوزہ ترامیم مذہبی اداروں کی آزادی کو متاثر کر سکتی ہیں۔ ادھر کیتھولک تنظیم کیتھولک ایرینا نے بھی اس معاملے پر تشویش ظاہر کرتے ہوئے کہا کہ بھارت میں عیسائی برادری پہلے ہی مختلف چیلنجز کا سامنا کر رہی ہے اور عالمی برادری کو اس مسئلے پر آواز اٹھانی چاہیے۔
دوسری جانب مرکزی حکومت مانسون اجلاس کے دوران ایف سی آر اے ترمیمی بل 2026 کو پارلیمنٹ سے منظور کرانے کی تیاری کر رہی ہے۔ مجوزہ بل کے تحت اگر کسی تنظیم کی ایف سی آر اے رجسٹریشن منسوخ یا ختم ہو جائے تو اس کے غیر ملکی فنڈز کے تحفظ کے لیے ایک نامزد اتھارٹی قائم کی جائے گی۔ اس کے علاوہ نئے قواعد کے مطابق غیر ملکی فنڈنگ مخصوص مقاصد اور منظور شدہ ریاستوں تک محدود ہوگی، جبکہ مذہبی تبدیلی کے مقصد سے کی جانے والی سرگرمیوں کو اجازت یافتہ مذہبی سرگرمیوں کی فہرست سے خارج کرنے کی تجویز بھی شامل ہے۔
واضح رہے کہ ایف سی آر اے قانون پہلی مرتبہ 1976 میں نافذ کیا گیا تھا، جس کے بعد 2010، 2016، 2018، 2020 اور اب 2026 میں اس میں مختلف ترامیم کی گئی ہیں۔ اس قانون کا بنیادی مقصد ملک میں بیرونی ذرائع سے آنے والی مالی معاونت کی نگرانی اور اس کے استعمال کو منظم کرنا ہے۔
cf527ae2-bf15-4c50-9518-17abe76f3105782026131544.png)