نئی دہلی: پاکستان میں ہونے والی آئی سی سی چیمپئنز ٹرافی 2025 کے حوالے سے پی سی بی اور بی سی سی آئی کے درمیان تناؤ جاری ہے۔ چیمپئنز ٹرافی کے حوالے سے اب ایک بڑا اپ ڈیٹ سامنے آیا ہے۔
پی ٹی آئی کی ایک رپورٹ کے مطابق آئی سی سی نے انٹرنیشنل کرکٹ کونسل (آئی سی سی) ہیڈ کوارٹر میں منعقدہ ایک غیر رسمی میٹنگ میں چیمپئنز ٹرافی کے لیے ہائبرڈ ماڈل کو حتمی شکل دے دی ہے۔
ہندوستان کو متحدہ عرب امارات میں اپنے حصے کے میچ کھیلنے کی اجازت ہوگی اور آئی سی سی نے پاکستان کرکٹ بورڈ (پی سی بی) کے مطالبات پر اتفاق کیا ہے کہ وہ 2027 تک اسی طرح سے آئی سی سی ایونٹس شیڈول کریں۔ آئی سی سی کے ایک ذریعہ نے پی ٹی آئی کو بتایاكہ تمام پارٹیوں نے اس بات پر اتفاق کیا ہے کہ 2025 کی چیمپئنز ٹرافی، متحدہ عرب امارات میں منعقد ہوگی اور پاکستان و ہندوستان اس میچ كو دبئی میں کھیلیں گے۔ یہ فیصلہ سب کے مفاد میں ہے۔
چیمپئنز ٹرافی ٹورنامنٹ اگلے سال فروری مارچ میں ہوگا۔ ہائبرڈ ماڈل پر اتفاق کرتے ہوئے پی سی بی نے 2031 تک بھارت کی میزبانی میں ہونے والے آئی سی سی ایونٹس کے لیے اسی طرح کے انتظامات کا مطالبہ کیا تھا۔ تاہم آئی سی سی نے 2027 تک اپنے تمام ایونٹس کے لیے ہائبرڈ ماڈل پر اتفاق کیا ہے۔ ہندوستان سری لنکا کے ساتھ مشترکہ طور پر خواتین ون ڈے ورلڈ کپ 2025 اور 2026 مینز ٹی 20 ورلڈ کپ كی میزبانی كرنے والا ہے۔
ذرائع كے مطابق 2026 مینز ٹی 20 ورلڈ کپ کے دوران پاکستان اپنے میچ سری لنکا میں کھیلے گا۔ چیمپئنز ٹرافی کے ہائبرڈ ماڈل کے لیے پی سی بی کی جانب سے مانگے گئے معاوضے پر ابھی غور کیا جا رہا ہے۔ چیمپئنز ٹرافی کے شیڈول کو حتمی شکل دینے کا راستہ صاف ہو گیا ہے جس کا دنیائے کرکٹ کو طویل عرصے سے انتظار تھا۔ بھارت نے 2008 کے ممبئی حملے کے بعد سے پاکستان کا دورہ نہیں کیا، جس میں 150 سے زائد افراد ہلاک ہوئے تھے۔ ان دونوں ممالک کے درمیان آخری دو طرفہ سیریز 2012 میں کھیلی گئی تھی۔
