مہاراشٹرا اور جھارکھنڈ میں اسمبلی انتخابات کی تاریخوں کا آج اعلان کیا جائے گا۔ الیکشن کمیشن آج دوپہر مہاراشٹرا اور جھارکھنڈ اسمبلی انتخابات کی تاریخوں کا اعلان کرنے والا ہے۔
اس سلسلہ میں الیکشن کمیشن آج سہ پہر 3:30 بجے ایک پریس کانفرنس کرے گا۔ اس موقع پر الیکشن کمیشن بتائے گا کہ انتخابات کتنے مرحلوں میں ہوں گے اور کیا تیاریاں کی گئی ہیں۔
اس بار مہاراشٹرا میں اسمبلی انتخابات کافی دلچسپ ہونے جا رہے ہیں۔ شیوسینا اور این سی پی دو گروپوں میں تقسیم ہونے کے بعد پہلی بار اسمبلی انتخابات میں آمنے سامنے ہوں گے۔ ادھو ٹھاکرے گروپ کی شیو سینا اور شرد پوار گروپ کی این سی پی مہا وکاس اگھاڑی اتحاد کے تحت الیکشن لڑے گی۔
اس کے علاوہ ایکناتھ شنڈے گروپ کی شیو سینا اور اجیت پوار گروپ کی این سی پی مہاوتی اتحاد کے تحت الیکشن لڑیں گی۔اطلاعات کے مطابق مہاراشٹرا کی 288 اسمبلی سیٹوں کیلئے 3 مرحلوں میں انتخابات ہوسکتے ہیں ۔ اس دوران جھارکھنڈ میں بھی اس مرتبہ انتخابات کافی دلچسپ ہونے والے ہیں.