حیدرآباد کے پرانے شہر میں رین بازار پولیس اسٹیشن کے حدود میں اتوار کی رات اس وقت کشیدگی پیدا ہوگئی جب ایک سوشل میڈیا اکاؤنٹ پر پوسٹ کردہ فرقہ وارانہ مواد کے خلاف احتجاج کرنے کے لیے ایک بڑی بھیڑ جمع ہوگئی۔
کچھ لوگوں نے ٹھاکر نامی شخص کے اکاؤنٹ پر پوسٹ کو دیکھا اور اس کے خلاف شکایت درج کرانے کے لیے پولیس سے رجوع کیا۔ اس خبر کے پھیلتے ہی لوگوں کی تعداد میں اضافہ ہوا جس سے امن و امان کی ممکنہ خرابی کے خدشات بڑھ گئے۔
اس دوران ساؤتھ زون کی ڈی سی پی اسنیہا مہرا نے کہا کہ شکایت درج کرائی گئی ہے اور فرد کے خلاف مقدمہ درج کیا گیا ہے۔ انہوں نے کہاکہ ہم اس کی تلاش کر رہے ہیں اور جلد ہی اسے گرفتار کر لیں گے۔ انہوں نے لوگوں سے افواہوں پر توجہ نہ دینے کی اپیل کی۔
اطلاعات کے مطابق یہ مسئلہ رات گیارہ بجے شرروع ہوا اور صبح تین بجے تک جاری رہا۔ یہاں تک کہ پولیس کی گشتی ٹیموں نے ان نوجوانوں کو منتشر کر دیا جو سڑک پر کھڑے تھے اور اس شخص کی گرفتاری کا مطالبہ کر رہے تھے۔