فیفا ورلڈ کپ کے گروپ مرحلے کے ایک اہم اور سنسنی خیز مقابلے میں کولمبیا اور پرتگال کے درمیان کھیلا گیا میچ 0-0 سے برابر رہا۔ دونوں ٹیموں نے پورے میچ کے دوران جارحانہ اور دفاعی حکمت عملی کا بہترین مظاہرہ کیا، تاہم کوئی بھی ٹیم گول کرنے میں کامیاب نہ ہو سکی۔ اس نتیجے کے بعد دونوں ٹیموں نے ناک آؤٹ مرحلے یعنی راؤنڈ آف 32میں اپنی جگہ یقینی بنا لی۔
کولمبیا کو گروپ میں سرفہرست مقام برقرار رکھنے کے لیے صرف ایک ڈرا درکار تھا، جبکہ پرتگال کو اگلے مرحلے میں رسائی حاصل کرنے کے لیے کم از کم ایک پوائنٹ چاہیے تھا۔ میچ برابر رہنے کے باعث دونوں ٹیموں کا مقصد پورا ہو گیا۔ کولمبیا گروپ میں پہلے نمبر پر رہا، جبکہ پرتگال دوسرے نمبر پر رہتے ہوئے اگلے مرحلے کے لیے کوالیفائی کر گیا۔
میچ کے دوران دونوں جانب سے متعدد حملے کیے گئے، لیکن دونوں ٹیموں کے گول کیپرز اور دفاعی کھلاڑیوں نے شاندار کارکردگی کا مظاہرہ کرتے ہوئے کسی بھی کوشش کو کامیاب نہیں ہونے دیا۔ شائقین کو اگرچہ گول دیکھنے کو نہیں ملا، لیکن مقابلہ سنسنی اور دلچسپی سے بھرپور رہا۔
میچ کا سب سے اہم لمحہ انجری ٹائم میں سامنے آیا، جب کولمبیا کو ایک قیمتی موقع ملا۔ اضافی وقت میں کولمبیا کو پنالٹی کارنر ملا، جس پر ڈیویسن سانچیز نے زبردست ہیڈر کے ذریعے گیند کو جال میں پہنچانے کی کوشش کی۔ تاہم ویڈیو اسسٹنٹ ریفری (VAR) کی جانچ کے بعد انہیں آف سائیڈ قرار دیا گیا، جس کے باعث گول مسترد کر دیا گیا اور میچ بغیر کسی گول کے اختتام پذیر ہوا۔
یہ مقابلہ کولمبیا کے لیے ایک تاریخی میچ بھی ثابت ہوا۔ فیفا ورلڈ کپ کی تاریخ میں پہلی مرتبہ کولمبیا نے کوئی میچ بغیر کسی گول کے برابر کھیلا۔اس سے قبل ورلڈ کپ میں کولمبیا کے تمام ڈرا میچز میں کم از کم ایک گول ضرور ہوا تھا، اس لیے یہ نتیجہ ٹیم کے ورلڈ کپ ریکارڈ میں ایک منفرد اضافہ بن گیا۔
دوسری جانب ایک اور اہم گروپ میچ میں ڈی آر کانگو نے شاندار کارکردگی کا مظاہرہ کرتے ہوئے ازبکستان کو 3-1 سے شکست دے دی۔ کانگو کے کھلاڑیوں نے ابتدا ہی سے جارحانہ انداز اپنایا اور مسلسل دباؤ برقرار رکھتے ہوئے تین خوبصورت گول اسکور کیے۔ ازبکستان کی ٹیم صرف ایک گول کرنے میں کامیاب رہی اور شکست سے نہ بچ سکی۔
اس کامیابی کے ساتھ ڈی آر کانگو نے بھی ناک آؤٹ مرحلے کے لیے کوالیفائی کر لیا اور اپنی شاندار فارم کا ثبوت دیا۔ گروپ مرحلے کے اختتام کے بعد اب راؤنڈ آف 32 کے دلچسپ مقابلوں کا آغاز ہوگا، جہاں دنیا کی بہترین ٹیمیں ورلڈ کپ ٹرافی کے حصول کے لیے ایک دوسرے کے مدمقابل ہوں گی۔ فٹبال شائقین کو توقع ہے کہ آنے والے میچز مزید سنسنی خیز، سخت مقابلوں اور یادگار لمحات سے بھرپور ہوں گے۔
