حیدرآباد میں واقعے مولانا آزاد نیشنل اردو یونیورسٹی (MANUU) میں اتوار کے روز سہارنپور، اتر پردیش میں ضلع کلکٹریٹ کمپلیکس کے اندر واقع مسجد کے انہدام کے خلاف طلبہ نے احتجاج کیا۔ احتجاج کا اہتمام MANUU اسٹوڈنٹس کلیکٹو کی جانب سے کیا گیا تھا، جس میں طلبہ نے مسجد کے انہدام کے معاملے پر اپنی تشویش کا اظہار کرتے ہوئے حکومت سے جواب دہی کا مطالبہ کیا۔ ایم سی جے ڈیپارٹمنٹ کے طالب علم مدثر انصاری نے الزام لگایا کہ حکومت مساجد، مدارس اور مذہبی شناختوں کو نشانہ بنا رہی ہے۔ انہوں نے کہا کہ ان کے مطابق اس طرح کے واقعات کوئی نئی بات نہیں ہیں اور بابری مسجد کے انہدام کے بعد سے ملک میں اس نوعیت کے معاملات مسلسل دیکھنے کو مل رہے ہیں۔
ایم سی اے ڈیپارٹمنٹ کے طالب علم عمران حسین نے کہا کہ سہارنپور میں مسجد کے انہدام کے واقعے کو صرف ایک مقامی یا الگ تھلگ معاملے کے طور پر نہیں دیکھا جانا چاہیے۔ ان کے مطابق یہ معاملہ مذہبی اور سماجی شناخت سے جڑا ہوا ہے۔ انہوں نے حکومت پر الزام لگایا کہ ایسے اقدامات کے ذریعے لوگوں کی سوچ اور خود اعتمادی کو متاثر کرنے کی کوشش کی جا رہی ہے۔ احتجاج سے خطاب کرتے ہوئے MSW ڈیپارٹمنٹ کے طالب علم ابراہیم جنیدی نے مذہبی تنظیموں سے اپیل کی کہ وہ اس معاملے پر متحد ہو کر اپنے مطالبات حکومت کے سامنے رکھیں۔ انہوں نے کہا کہ کسی بھی کارروائی کے لیے مناسب قانونی اور عدالتی عمل کو یقینی بنایا جانا چاہیے۔ انہوں نے معاملے میں ذمہ داری طے کرنے اور جواب دہی کا مطالبہ بھی کیا۔ بعد ازاں شعبہ اردو کے ریسرچ اسکالر صالح انصاری نے خطاب کرتے ہوئے سہارنپور مسجد کے انہدام کو بی جے پی اور آر ایس ایس کے مبینہ ایجنڈے سے جوڑا۔ انہوں نے الزام لگایا کہ اس طرح کے اقدامات ملک کی مشترکہ ثقافتی روایت اور گنگا-جمونی تہذیب کو نقصان پہنچا سکتے ہیں۔
احتجاج کے دوران طلبہ نے مسجد کے انہدام پر سوالات اٹھائے اور حکومت سے معاملے میں شفافیت اور قانونی طریقہ کار پر عمل کرنے کا مطالبہ کیا۔ سہارنپور میں مسجد کے انہدام کے بعد یہ معاملہ سیاسی اور سماجی سطح پر بھی بحث کا موضوع بنا ہوا ہے۔ حیدرآباد میں MANUU طلبہ کا احتجاج اسی سلسلے کی ایک کڑی ہے، جہاں طلبہ نے اپنے تحفظات کا اظہار کرتے ہوئے حکومت سے اس معاملے میں جواب دینے اور کارروائی کی ذمہ داری طے کرنے کا مطالبہ کیا۔
